Joseba Sarrionandiak Iñigo Astizi atzoko Berrian: “literatura ez da testu bat sortzea estilo batekoa, da mezu bat sortzea komunitate batentzat […] eta hori zelan ematen den eta zelan jasotzen den da inportantea.” Ideia horri jarraituz, ez dago literaturarik balizko irakurleen komunitatea ez badu sortzen edota zaintzen. Testua beharrezkoa da, noski, baita irakurleen arteko interakzio eremua ere. Horregatik literatura bakardadearen kontrako ariketa komunikatiboa dela esan genezake. Borroka horretan baina, nahi ez den bakardadea gero eta arazo handiagoa dugu, hainbat faktoreren ondorioz: urbanizazioa, konexioa erraztu dezakeen teknologia, aldi berean isolamendua eta indibidualismo kulturala ere sustatzen dituena. Pertsona asko deskonektatuta eta isolatuta sentitzen dira, “konektatuta” dauden hiri handietan bizi arren.
AKTIBAn gai hori interesatzen zaigulako, Bitoriano Gandiaga euskal poetaren hainbat testuren edizioa egin dugu, “Joxe Azurmendi” Pentsamendu Garaikideko Katedrarekin elkarlanean. Aukeratutako testuak bere bigarren liburutik datoz, Hiru gizon bakarka, duela 50 urte argitaratua. Testuetan txakolina aipatzen da, Francoren diktaduraren amaieran, euskal herritarrentzat zaila zen une batean, batzeko eta berritzeko beharraren sinbolo gisa. Poemek gai ugari ukitzen dituzten arren, gure edizio txiki honek nabarmentzen du literatura eta artearen potentziala pertsonak mezu/misio baten inguruan elkartzeko eta nahi ez den bakardadea arintzeko, bai euskal gizartean, bai mundu garaikidean oro har.
Liburuxka hemen deskarga daiteke.
AZKEN BERRIA!
Gandiagaren “Hiru gizon bakarka”k mende erdia bete duela ospatzeko, Uda Ikastaro berezi bat antolatu dugu Arantzazun. Programa martxoaren amaieran argitaratuko da.