Garagea ez da soilik proiektuen biltegi bat, baizik eta ikerketa, irakaskuntza, kultura eta esperimentazio sozialaren arteko trantsizio-espazio bat. Orrialde honek beste eragile batzuekin elkarlanean garatzen ari garen prototipo batzuk biltzen ditu. Guztiek norabide komun bat dute: metodologia ludikoak, testuinguruan kokatutako esperimentazioa eta komunitatearen aktibazioa. Laborategi ireki gisa funtzionatzen dute, deliberazio, ikaskuntza eta sorkuntza kolektiborako modu berriak probatzeko.
Arbaso Eguna
Facilitaziorik gabeko rol-joko bat, memoria kolektiboa, hizkuntza-aniztasuna eta etorkizun posibleak uztartzen dituena. Esperientzia bi mihisetan egituratzen da, bat indibiduala eta bestea komunitarioa, orainaldiaren eta etorkizunaren artean narratiboki bidaiatzeko aukera emanez. Euskaraz edo gaztelaniaz jakin ez arren ere parte hartzeko moduan diseinatua, translanguaging baliatuz aniztasun kulturalean sakontzeko. Solarpunk Futures-en oinarritua. Ikertze Kultur Elkartearekin elkarlanean, Kutxa Fundazioak finantzatua.
Jolas Gaua
Ez da joko bat, baizik eta jokoek bizia hartzen duten azpiegitura soziala. Ludoteka mugikor bat eta bitartekaritza kulturalerako gailu bat, komunitate jokalariak aktibatzen dituena testuinguru ezberdinetan, liburu-dendetan, elkarteetan, espazio kulturaletan. Prototipoak iteratiboki probatzeko eta feedbacka jasotzeko ingurune gisa ere funtzionatzen du. Ikertze Kultur Elkartearekin elkarlanean, Kutxa Fundazioak finantzatua.
Intergroup Alliances in the Age of Collapse
Psikologiako ikasleentzat diseinatutako simulazio murgiltzaile bat, talde-identitatea, gatazka eta lankidetza aztertzen dituena krisi ekosozialeko testuinguruetan. Rol-dinamikak, ziurgabetasunpeko erabaki-hartzea eta hausnarketa gidatua uztartzen ditu.
Unibertsitatea-Gizartea ECOLAPSO proiektuarekin elkarlanean, EHU-k finantzatua eta Magdalena Bobowik eta Maitane Arnoso-k gidatua.
Nigan bizi den paisaia
Hezkuntza-berrikuntzako proiektu bat, The Ground Itself bakarkako jokoan inspiratua. Idazketa gidatuaren eta esplorazio narratiboaren bidez, ikasleek paisaia esanguratsuak aztertzen dituzte, lakua, hondartza, mendia, basoa, hiria, lorategia edo espazio-kolonia. Lurraldearen dimentsio sentsorialak, historikoak eta politikoak integratzen ditu, esperientzia estetikoa eta analisi kritikoa uztartuz. “Paisaia kulturalak” irakasgaiaren barruko jarduera praktikoa, Gipuzkoako campuseko Esperientzia Geletan, Ur Mara Museoarekin elkarlanean.
Academia: dilemak unibertsitate-bizitzan
Joko deliberatibo baten prototipoa, bizitza akademikoko dilema etiko errealak esperientzia partekatu bihurtzen dituena. Etorkizuneko plataforma digital baterako oinarri gisa diseinatua, rol-jokoetan eta dinamika sozialetan inspiratutako mekaniken bidez deliberazio etikoa normalizatzea du helburu. EHUko Ikerketako Praktika Onen Kodearen eta ENLIGHT unibertsitate aliantzaren InnoGameX proiektuaren garapenarekin lotuta dago.
Walden in Midsummer
Folk horror-aren eta ingurumen-filosofiaren arteko esperimentu narratibo bat. Komunitatearen, paisaiaren eta arrotztasunaren arteko harremana aztertzen du rol-jokoen dinamikak erabiliz. Thoreauren lanean eta narrazio garaikideetan inspiratua, iruditeria ekologikoak lantzeko laborategi gisa funtzionatzen du, kezkagarritasunetik eta muga-egoeretatik abiatuta. Filosofia: Zientzia, Gizartea, Teknologia masterraren MALekin lotutako proiektua.