Obabakoak liburuan, Bernardo Atxagak antzararen jokoa artistaren bizitzarekin alderatzen du. Haren kasuan, idazketaz ari da, baina pazientzia, arreta eta jarraitutasuna eskatzen duen edozein sorkuntza-moduz ari liteke:
“Jokoaren mezua, beraz, jarraitzen zaila bezain sinplea da. Kontua gauzak ondo egitea litzateke, egunez egun, antzaraz antzara; jarraitutasun horrek bakarrik bermatuko luke azken jakinduria eta perfekzioa.”
Antzeko zerbait gertatzen da Walden liburuan, Thoreauk Kourooko artistaren istorioa kontatzen duenean: gizon hark makila bat lantzen du halako arretaz, non denborak haren inguruan igarotzeari uzten diola baitirudi:
“He had made a new system in making a staff, a world with full and fair proportions”.
Jolas/jokoak artea dira, bizitzak berak ere jolas/joko baten antza duelako: batzuetan dibertigarria, batzuetan ziurgabea, batzuetan arriskutsua. Dadoak botatzen ditugu, laukietan aurrera egiten dugu, atzera itzultzen gara, beste pertsona batzuekin topo egiten dugu, arauak jarraitzen ditugu, hausten ditugu, eztabaidatzen ditugu eta berriz egiten ditugu. Eta mugimendu horretan, bizitzen ikasten dugu pixka bat.
Horregatik, goiz bat Ur Mara Museoan pasatzera gonbidatu nahi zaitugu, lekuarekin, paisaiarekin, memoriarekin eta etorkizunarekin dugun harremanaz hitz egiten duten bi jolas edo artefaktu artistikorekin. Obabatik ez oso urrun egingo dugu, artea, basoa eta etxea elkartzen diren ingurune batean; Waldenen inspiratutako gune batetik gertu ere bai.
Bi jolasek badute zerbait komunean: denboran mugitzeko aukera ematen digute. Ez orainalditik ihes egiteko, baizik eta orainaldia beste modu batera begiratzeko. Atzera eta aurrera egingo dugu irudimena, hitza eta lagunartekoa erabiliz. Izan ere, Atxagak Obabakoak liburuaren hasieran idatzi zuen bezala:
“Gazte gauden bitartean –pentsatu zuen–, oso aldi bakanetan ekiten diogu bakarka gogoratzeari, eta orduan ere apenas digun iraganak axolarik. Pasatako egunetan gertatutakoa argitzea ez da izaten helburua. Iraganaz hitz eginez, gaztetan, etorkizunaz hitz egiten da, etorkizun horrekiko dauzkagun desio eta beldurrez. Bizitzari eskatuko liokeena azaltzen du gazteak gogoratzearen aitzakiaz.”
Hori izango da gure abiapuntuko galdera ere: zer egiten dugu gogoratzen dugunean? Benetan iraganari begiratzen diogu, ala etorkizun posibleak entseatzen ari gara? Zer istorio kontatuko ditu etorkizunak gutaz? Zer gogoratuko dute garai honetaz gure ondoren etorriko direnek?
Izena emango duzu?
Bi rol-jolas narratibo eta kolaboratibotan arituko gara. Ez da aurretiazko esperientziarik behar. Ez da antzeztu behar, ez da inprobisatzen jakin behar, ezta arau konplikatuak ezagutu ere. Nahikoa da bertan egotea, entzutea, irudikatzea eta elkarrekin eraikitako istorio batek eramaten uztea.
Jolasetako bat The Ground Itself izango da: denboraren joanean aldatzen den leku bati buruzko esperientzia narratiboa, haren arrastoak, zauriak, biztanleak, desagerpenak eta itzulerak kontatzeko.
Bestea Arbaso Eguna izango da. Bertan, etorkizuneko batzar batek bere arbasoak gogoratzen ditu, eta erronka kolektibo handi bat nola gainditu zuten berreraikitzen du. Parte-hartzaileek mundu desiragarri baterako bideak irudikatzen dituzte etorkizun utopiko baten ikuspegitik, arbasoak, tresnak, balioak eta benetako erronkak erabiliz kontakizun partekatu bat sortzeko.
Gure arbasoekin konektatuko gara, eta etorkizunean gutaz zer-nolako istorioak kontatuko diren irudikatuko dugu, Kim Stanley Robinsonen hitzetan, “zibilizazio ezezagun baten arbasoak” garenean.
Saioa euskaraz edo gaztelaniaz jokatu ahal izango da, mahai bakoitzean sortzen den taldearen arabera. Jolasa hizkuntzen, belaunaldien eta mundua begiratzeko modu desberdinen arteko elkargune ere izan nahi du.
- Non: Ur Mara Museoa, Alkiza, Gipuzkoa
- Noiz: ekainaren 7an, igandea, 10:00-13:00
- Jarduera: paisaiari, memoriari eta etorkizunari buruzko bi jolas narratiborekin proba-saioa
- Hizkuntzak: euskara edo gaztelania, taldearen arabera
- Ez da aurretiazko esperientziarik behar rol-jolasetan, baina bai izena ematea (mahaiak eta mokauak antolatzeko): antonio [puntu] casado [abildua] ehu [puntu] eus.
- Laguntzaileak: Kutxa Fundazioa, Ur Mara Museoa, Ikertze